Салдат. Менавіта ён вытрымаў усе наступствы вайны. І не проста вытрымаў, але і абараніў мірнае насельніцтва, і перамог у схватцы з лютым ворагам. Ён – прататып скульптуры на брацкай магіле ў Падлессі. У позірку салдата з бронзы – і смутак, і трагізм, і бязмежная воля да жыцця, якая дапамагала вытрымаць і перамагаць. Летам 1944 года на большасці тэрыторыі Ляхавіцкага раёна можна было пачуць выбухі гармат, адзіночныя стрэлы аўтаматаў, грукат  танкаў – ішлі баі за вызваленне кожнага куточка беларускай зямлі ад фашысцкіх захопнікаў. Змагаліся ўсе: мірнае насельніцтва, партызаны і, вядома ж, салдаты і афіцэры дзеючай арміі. Недалёка ад вёскі Шавялі размяшчаўся ваенны шпіталь, куды дастаўляліся параненыя з усёй акругі. Нягледзячы на ўсе намаганні ваенных медыкаў, многія паміралі ад ран, гангрэны ці проста не вытрымлівала сэрца. Забітых і памёршых хавалі ў агульных магілах. Толькі пасля Вялікай Айчыннай вайны вырашана было пахаваць усіх загінуўшых пры вызваленні Падлесся і бліжэйшых вёсак у брацкай магіле. У 1952 годзе адбылося перазахаванне загінуўшых. А праз чатыры гады на гэтым месцы устанавілі помнік.

   Сярод 139 прозвішчаў, выбітых на пліце, прадстаўнікі розных нацыянальнасцей: рускія, беларусы, грузіны, украінцы – усе змагаліся за Радзіму. Амаль штогод да брацкай магілы прыязджалі родныя і блізкія тых, хто назаўсёды застаўся ляжаць на беларускай зямлі. Вось некалькі радкоў з успамінаў  Л. Калашнікавай, пляменніцы радавога Васіля Мікалаевіча Рэпкі, які загінуў  12 ліпеня 1944 года: “Некалькі гадоў я займалася пошукамі матэрыялаў пра майго загінуўшага дзядзьку Васіля Мікалаевіча Рэпку. На запытанне прыйшлі адказы, што ён загінуў у 1944 годзе і пахаваны ў вёсцы Падлессе. У дні 40-годдзя Перамогі мы з усёй сям’ёй прыехалі на магілу дзядзькі. Яна дагледжана піянерамі мясцовай школы і жыхарамі вёскі. Кожны з нас узяў на памяць жменьку зямлі гэтага краю. Мы, жыхары украінскай вёскі, вельмі ўдзячны беларускім братам за ўвагу, ветлівасць, за тое, што ўшаноўваюць памяць воінаў і дарагога нам чалавека”.

На гранітнай пліце словы: “Радзіма помніць сваіх герояў. Тут пахаваны воіны Савецкай арміі, якія загінулі смерцю храбрых пры вызваленні вёскі Падлессе Ляхавіцкага раёна ад нямецка-фашысцкіх захопнікаў”. Памяць пра іх у народзе бессмяротная. Яны загінулі ў імя Перамогі.